ពិធីសម្ពោធដាក់អោយប្រើប្រាស់ នូវបង្គន់អនាម័យ ដែលជាជំនួយឧបត្ថម្ភដោយស្ថានទូតសហរដ្ឋអាមេរិក ប្រចាំកម្ពុជា

នៅសាលាបឋមសិក្សាសម្តេច ជា ស៊ីម ស្ថិតក្នុងសង្កាត់លេខ ២ ក្រុងព្រះសីហនុ ខេត្តព្រះសីហនុ ថ្ងៃទី ០២ ខែ តុលា ឆ្នាំ ២០១៤ មានប្រារព្ឋពិធីសម្ពោធដាក់អោយប្រើប្រាស់ នូវបង្គន់អនាម័យមួយខ្នង ដែល​ជា​ជំនួយ​ឧបត្ថម្ភ​ពី​ស្ថានទូត​សហរដ្ឋអាមេរិក ប្រចាំនៅកម្ពុជា ត្រូវបានប្រព្រឹត្តិទៅក្រោមអធិបតីភាពលោក អ៊ឹង និបុណ្ណា អនុ​ប្រធាន​អប់​រំ យុវជន និង កីឡា ខេត្តព្រះសីហនុ ។ នៅ​ក្នុង​ចំណាប់អារម្មណ៏របស់លោក ម៉ៃ ក្ខៃក្ខា (MIKE GUAIGUA) តំណាង​ស្ថានទូតអាមេរិក ប្រចាំនៅកម្ពុជា បានអោយដឹងថា បង្គន់អនាម័យមួយខ្នងមាន ៥បន្ទប់ បំពាក់​ដោយ​សំភារៈ​ និង ស៊ីទែនទឹកចំណុះ ២០០០លីត្រ ចំនួន ១ ដែលត្រូវចំណាយថវិការអស់ចំនួន ២ម៉ឺនដុល្លារអាមេរិក ដែល​បាន​ចាប់ផ្តើមសាងសង់នៅថ្ងៃទី ១៤ ខែ សីហា និង បញ្ចប់នៅថ្ងៃទី ២៩ ខែ កញ្ញា ឆ្នាំ ២០១៤ ក្រោម​ការ​សាង​សង់ជាលើកទី១ ក្នុងបេសកម្មរយៈពេល ៦ខែ នៅប្រទេសកម្ពុជា ដោយ​ក្រុម​វិស្វកម្ម​ទាហ៊ាន​ជើងទឹក​សហរដ្ឋ​​អាមេរិក N.M.C.B លេខ ៤ ។ លោក អ៊ឹង នីបុណ្ណា អនុប្រធានមន្ទីរអប់រំយុវជន និង កីឡា ខេត្ត​ព្រះសីហនុ​ បាន​មាន​ប្រសាសន៏​សង្កត់ធ្ងន់ថា ពិធីសម្ពោធដាក់អោយប្រើប្រាស់ នូវបង្គន់អនាម័យ ដែល​ជា​ជំនួយ​ឧបត្ថម្ភ​ពី​ស្ថានទូតសហរដ្ឋអាមេរិក ប្រចាំនៅកម្ពុជា នៅពេលនេះគឺពិតជាមានអត្ថប្រយោជន៏ និង មាន​តម្លៃ​ក្នុង​ការ​ជួយ​ថែរក្សាអនាម័យ និង ថែទាំសុខមាលភាពដល់ក្មួយៗ សិស្សានុសិស្ស ក៏ដូចជា​ការ​កែលំអ​បរិស្ថាន​របស់​សាលា​បឋមសិក្សាសម្តេច ជា ស៊ីម ផងដែរ ។ លោក​ក៏បានបន្តទៀតថា សមិទ្ឋិផលថ្មីនេះ គឺពិតជាមានលក្ខណៈ និង មាំ ពិសេសដែលជាការចូលរួមវិភាគទានដ៏សំខាន់ក្នុងការរួមចំណែក អភិវឌ្ឍន៏វិស័យអប់រំ បណ្តុះ​បណ្តាល​ធនធាន​មនុស្សអោយកាន់តែប្រសើរ សមស្របតាមខ្លឹមសាររបស់រដ្ឋធម្មនុញ្ញ នៃព្រះរាជាណាចក្រកម្ពុជា ក៏​ដូច​ជា​គោល​នយោបាយ និង ផែនការយុទ្ឋសាស្ត្រកាត់បន្ថយភាពក្រីក្រ របស់រាជរដ្ឋាភិបាល ។ បន្ទាប់​​មក​គណៈ​អធិបតី​ ក៏បានប្រគល់លិខិតថ្លែងអំណរគុណ ជូនដល់តំណាង ស្ថានទូតអាមេរិក ប្រចាំនៅកម្ពុជា និង បាន​អញ្ជើញ​កាត់ខ្សែបូ ជានិមិត្តរូបដាក់អោយប្រើប្រាស់ ជាផ្លូវការចាប់ពីពេលនេះតទៅ ៕