បេក្ខជនមន្ត្រីរាជការ ស៊ីវិលក្រសួងមហាផ្ទៃ ចំនួន ១៨៤នាក់ មកពី៤ខេត្ត ចូលរួមប្រឡងផ្ទៃក្នុង ដើម្បីផ្លាស់ប្តូរក្របខ័ណ្ឌ នៅខេត្តព្រះសីហនុ

បាន​មកធ្វើការប្រឡងប្រជែងផ្ទៃក្នុង ដើម្បីផ្លាស់ប្តូរក្របខ័ណ្ឌ នៅមណ្ឌលប្រឡងខេត្តព្រះសីហនុ កាល​ពី​ព្រឹក​ថ្ងៃទី ១៤ ខែ កញ្ញា ឆ្នាំ ២០១៤ ។ ហើយកម្មវិធីប្រឡងនេះ បានប្រព្រឹត្តិទៅរយៈពេលមួយព្រឹក ក្រោម​​​​​ការអង្កេតត្រួតពិនិត្យដោយផ្ទាល់ ពីសំណាក់ឯកឧត្តម ហេង សំអាន អភិបាល​រង​នៃ​គណៈ​អភិ​បាល​ ខេត្តព្រះសីហនុ មន្ត្រីក្នុងសាលាខេត្ត ព្រមទាំងមន្ត្រី មកពីក្រសួងមហាផ្ទៃ ។ ដើម្បី​អោយ​ការ​ប្រឡង​នេះ មានតម្លាភាព តាមមន្ត្រី ក្នុងសាលាខេត្តព្រះសីហនុ បានអោយដឹងថា នេះ​ជា​ការ​ប្រឡង​ដ៏​សំខាន់​មួយរបស់មន្ត្រីរាជការស៊ីវិល ដែលបានខិតខំបំរើការងារនៅតាមបណ្តាក្រុង ស្រុក និង សា​លា​ខេត្ត ក្នុងក្របខ័ណ្ឌមន្ត្រីរដ្ឋជាន់ខ្ពស់ និង មធ្យម ។ ឯកឧត្តម ហេង សំអាន អភិបាលរងខេត្តព្រះសីហនុ បាន​អញ្ជើញជាអធិបតីក្នុងពិធីកាត់បើកកញ្ចប់ វិញ្ញាសារ មុននឹងដាក់អោយបេក្ខជនធ្វើការប្រឡងដើម្បី បង្ហាញពីសក្ខីភាព នៃការផ្តល់យុត្តិធម៌ សំរាប់កម្មវិធីប្រឡងទាំងមូល ឯកឧត្តម អភិបាលខេត្ត ក៏​បា​ន​ជំរុញ​អោយគណៈគ្រប់គ្រងមណ្ឌលប្រឡង ក៏ដូចជាមន្ត្រីមានសមត្ថកិច្ចពាក់ព័ន្ឋ មាន​ភារកិច្ច​នៅ​ក្នុង​មណ្ឌល​ប្រឡងទាំងអស់ យកចិត្តទុកដាក់ត្រួតពិនិត្យ អោយបានល្អ លុបបំបាត់ភាពអនាធិបតេយ្យ ផ្សេងៗ​សំរាប់ដំណើរការប្រឡងរហូតដល់ពេលបញ្ចប់ ។ ឯកឧត្តម អភិបាលរងខេត្តមានប្រសាសន៏ បញ្ជាក់​អោយដឹងថា បេក្ខជនចំនួន ១៨៤នាក់ នេះមកពីខេត្តព្រះសីហនុ កំពត កែប និង កោះកុង កំរិត​នៃ​ការ​ប្រឡងមានពីរកំរឹត គឺក្របខ័ណ្ឌមន្ត្រីរដ្ឋបាលជាន់ខ្ពស់ និង ក្របខ័ណ្ឌមន្ត្រីក្របការ ហើយ​វិញ្ញាសារ​​ដែលដាក់អោយបេក្ខជនប្រឡងនៅពេលនេះ លើវិញ្ញាសារសរសេរ និតិមុខងារសាធារណៈ និង​ និតិរដ្ឋបាល ក្រោយពីការប្រឡងនេះរួច បេក្ខជននិងផ្លាស់ប្តូរក្របខ័ណ្ឌពី ខ ទៅ ក និង​ពី​ក្រប​ខ័ណ្ឌ​គ ទៅ ខ តាមកំរិតក្របខ័ណ្ឌជាបន្តបន្ទាប់ ៕​