សិក្ខាសាលាស្តីពីការរៀបចំផែនការត្រៀមបម្រុងឆ្លើយតបគ្រោះអាសន្ន

ថ្ងៃទី១៩ ខែសីហា ឆ្នាំ២០១៤សាលាខេត្តកំពង់ស្ពឺ រៀបចំសិក្ខាសាលាស្តីពីការរៀបចំផែនការត្រៀម​បម្រុង​ឆ្លើយ​តប​គ្រោះអាសន្ន។ ក្រោមអធិបតីភាព ឯកឧត្តម អ៊ូ សំអួន អភិបាល​ នៃគណៈអភិ​បាលខេត្តកំពង់ស្ពឺ និងចូលរួមពីអភិបាល អភិបាលរងក្រុង ស្រុកទាំង៨ ប្រធានអនុប្រធាន​មន្ទីរជុំវិញខេត្ត កងកំលាំងទាំងបី ព្រមទាំងអង្គការសង្គមស៊ីវិលជាច្រើនរូបទៀត។

តាមរបាយការណ៏រដ្ឋបាលខេត្តបានបង្ហាញឲ្យដឹងថា៖ ​ចាប់ពីដើមខែកក្កដា រហូតដល់ដើម​ខែសីហា ឆ្នាំ២០១៤ អាកាសធាតុកាន់តែក្ដៅខ្លាំង ឯភាពអំណោយផលពីទឹកភ្លៀង នៅតែមិនគ្រប់​តាមតម្រូវការសម្រាប់ការងារបង្កបង្កើនផលដើមរដូវរបស់ប្រជាកសិករនៅ ឡើយ។ ផ្អែកតាម​របាយការណ៍​​របស់មន្ទីរកសិកម្មខេត្ត មន្ទីរធនធានទឹក និងឧតុនិយមខេត្ត និងរបាយការណ៍របស់ក្រុង ស្រុកទាំង៨ បង្ហាញថា លទ្ធផលនៃការងារបង្កបង្កើនផលរដូវវស្សា​ឆ្នាំ២០១៤នេះមានការរអាក់រអួល និងថយចុះយ៉ាងច្រើនបើប្រៀបធៀបនឹងលទ្ធផលក្នុងរយៈពេល ៥ឆ្នាំ​ចុងក្រោយ ក្នុងនោះរួមមាន៖

· ផែនការស្រូវវស្សាសរុបចំនួន ១១៣,៦០០ហិកតា យើងសម្រេចបាន៖

-ភ្ជួររាស់សរុប ៥២,៥២៦ហិកតា ទាបជាងឆ្នាំ២០១៣ចំនួន ១៥៧,៨៨៦ហិកតា

-សាបសរុប​ ៨,៤១៨ហិកតា ទាបជាងឆ្នាំ២០១៣ចំនួន ៦,៧៦៩ហិកតា

-ស្ទូង ព្រោះ ដាំសរុប១៧,៧៨៩ហិកតា ស្មើនឹង១៥,៦៦% នៃផែនការ ទាបជាងឆ្នាំ​២០១៣ចំនួន ៥២​,៣​​​៣​៤ហិកតា

-ដំណាំរួមផ្សំ ៤,២៩៣ហិកតាទាបជាងឆ្នាំ២០១៣ចំនួន ៦,៤៣២ហិកតា

ដោយ​​​​​សារតែភាពរាំងស្ងួតបានអូសបន្លាយចាប់ពីខែមិថុនា រហូតមកដល់បច្ចុប្បន្ននេះ ទើប​បណ្ដាល​ឲ្យរងផលប៉ះពាល់ដល់ការងារបង្កបង្កើនផលក្នុងទូទាំងខេត្តសរុបចំនួន ១១១៨៣,៧ហិកតា ស្មើនឹង ៧៧/៨៧ឃុំ សង្កាត់ និង១០៨៦/១៣៤២ភូមិ ក្នុងនោះរួមមាន៖

-សំណាបសរុប​ ៥៨៧៨,៨ហិកតា ក្នុងនោះងាប់ហួសចំនួន ១៥៧៣ហិកតា

-សន្ទូងសរុប ៥០០៥,៩ហិកតា ក្នុងនោះងាប់ហួសចំនួន ៥០៧ហិកតា

-ដំណាំរួមផ្សំ ២៩៩ហិកតា ក្នុងនោះងាប់ហួសចំនួន ៦២ហិកតា

ឯកឧត្តម អ៊ូ សំអួន អភិបាលនៃគណៈអភិបាលខេត្តកំពង់ស្ពឺមានប្រសាសន៏ថា៖ ​ដោយមានកិច្ច​សហការ​​ល្អរវាងរដ្ឋបាលខេត្ត និងជាប្រធានគណៈកម្មាធិការខេត្តគ្រប់គ្រងគ្រោះ​មហន្តរាយ, មន្ទីរ​ធនធានទឹក និងឧតុនិយមខេត្ត, មន្ទីរកសិកម្មខេត្ត, អាជ្ញាធរមូលដ្ឋាន សប្បុរសជន និងមានការ​ចូលរួម​ពីប្រជាពលរដ្ឋ យើងបូមសង្រ្គោះបានលើផ្ទៃ ១,០៩៩ហិកតា ដោយប្រើប្រាស់​ម៉ាស៊ីនសរុបចំនួន ១៩គ្រឿង ក្នុងនោះម៉ាស៊ីនរបស់ ឯកឧត្ដម សាយ ឈុំ ចំនួន ៦គ្រឿង, ម៉ាស៊ីន​របស់មន្ទីរធនធានទឹក និងឧតុនិយមខេត្តចំនួន ៩គ្រឿង ម៉ាស៊ីនរបស់សាលាស្រុកសំរោងទងចំនួន ៤គ្រឿង ក្រៅពីនោះជាម៉ាស៊ីនរបស់ប្រជាពលរដ្ឋ ដោយចំណាយប្រេងម៉ាស៊ូតសរុប ៩,៩១០លីត្រ ប្រេងសាំង៨៨០លីត្រ ប្រេងរំអិល ១៤០លីត្រ និងផ្ដល់ពូជស្រូវជូនប្រជាពលរដ្ឋធ្វើការសាប ព្រោះឡើងវិញចំនួន ១៤តោន ៥០០គីឡូក្រាម ស្មើនឹង ១៤៥០គ្រួសារ ។ ជាមួយនោះ​ដោយមានការសហការរវាងមន្ទីរកសិកម្មខេត្ត និង​នាយកដ្ឋានគ្រឿងយន្តកសិកម្ម បានចុះជួយភ្ជួរអន្ត​រាគមន៍ដោយត្រាក់ទ័រជូនប្រជាពលរដ្ឋបានចំនួន៥៧​ហិកតា អស់ប្រេងម៉ាស៊ូត ១៣២០លីត្រ នៅស្រុកបរសេដ្ឋ និងក្រុងច្បារមន ។

-ជួយកាយប្រឡាយ ១ខ្សែ ប្រវែង ៥១០ម៉ែត្រ នៅស្រុកគងពិសី ចំណាយថវិកា ៧០០$

-ជួយកាយប្រឡាយ ១ខ្សែ ប្រវែង ១,២០០ម៉ែត្រ នៅក្រុងច្បារមន ចំណាយថវិកា ១,៣០០$

-ជួយឧបត្ថម្ភស៊ីម៉ង់ត៍ ២តោន និងប្រេងម៉ាស៊ូតចំនួន ៤០០លីត្រ

ឯកឧត្តមបានបន្តទៀតថា៖ ការងារបង្កបង្កើនផលឆ្នាំ២០១៤នេះមានភាពរអាក់រអួលយឺតយ៉ាវ និង​មានការថយចុះយ៉ាង​ច្រើនបើប្រៀបធៀបនឹងរយៈពេលដូចគ្នាឆ្នាំ២០១៣ ដោយសារគ្រោះ​រាំង​ស្ងួត​​បានអូសបន្លាយ ។ ប្រសិន​បើក្នុងខែសីហានេះ មិនមានភ្លៀងធ្លាក់គ្រប់គ្រាន់អាច​នឹងប៉ះពាល់​យ៉ាង​ធ្ងន់ធ្ងរដល់សំណាប និងសន្ទូង​របស់ប្រជាពលរដ្ឋ ប៉ុន្តែបើចាប់ពីពាក់កណ្ដាលខែសីហានេះ និងដើមខែកញ្ញានេះមានភ្លៀងធ្លាក់គ្រប់គ្រាន់​នោះទើបការងារបង្កបង្កើនផលរបស់ប្រជាកសិករអាចនឹងសម្រេចតាមផែនការ ។

ឯកឧត្តមក៏បានដាក់វិធានការចំពោះមុខដល់មន្ទីរអង្គភាពពាក់ព័ន្ធ៖
បន្តពង្រឹងការងារបូមសង្រ្គោះបន្ទាន់នៅតាមមុខសញ្ញាដែលកំពុងជួបគ្រោះរាំងស្ងួតនៅកន្លែងដែល
មានប្រភពទឹក ។

-បន្តស្វែងរកជំនួយដើម្បីបូមសង្រ្គោះ នៅតំបន់ដែលមានប្រភពទឹក

-ផ្សព្វផ្សាយ និងលើកទឹកចិត្តដល់ប្រជាកសិករឲ្យធ្វើស្រូវពង្រោះ ជំនួសការសាប ដក ស្ទូង ហើយ
បង្រៀនពីបច្ចេកទេស និងការថែទាំដើម្បីទទួលបានទិន្នផលខ្ពស់ ។

-ស្រង់ស្ថិតិប្រជាពលរដ្ឋដែលជួបការលំបាក ខ្វះខាតស្បៀង

-បន្តចុះពិនិត្យ និងដោះស្រាយស្រូវពូជ (មិនប្រកាន់រដូវ) ពូជបន្លែ និងបង្ក​បង្កើន​ផលនាចុងរដូវ។

-រៀបចំថ្នាលសំណាបរួមតាមគោលដៅដែលមានប្រភពទឹក

-ត្រៀមលក្ខណៈល្អដល់ការត្រៀមបង្ការ និងឆ្លើយតបគ្រោះរាំងស្ងួត និងគ្រោះទឹក​ជំនន់​នាចុងរដូវ៕