អាជ្ញាធរខេត្តព្រះសីហនុ រួមសហការជាមួយសភាយុវពាណិជ្ជករអន្តរជាតិកម្ពុជា សាខាចតុមុខ ដាំកូនឈើ នៅក្នុងក្រុងព្រះសីហនុ ក្រោមប្រធានបទ “យើងនាំគ្នាដាំដើមឈើ ចាំអង្គាល់ទៀត”

សកម្មភាព​នេះ​ ធ្វើ​ឡើង​កាល​ពី​ព្រឹក​ថ្ងៃ​ទី ១០​ ខែ​ សីហា​ ឆ្នាំ​ ២០១៤​ រៀប​ចំ​សហការ​រវាង​​អាជ្ញា​ធរ​​​​​​​ខេត្ត​​ព្រះសីហនុ​ ជាមួយ​សភា​យុវពាណិជ្ជករ​អន្តរជាតិ​កម្ពុជា​ ចតុមុខ​ក្នុង​គោល​បំណង​រួម​ចំណែក​បំផុស​គំនិត​ដល់​សាធារណៈ​ជន​ទាំង​អស់​អោយ​ស្រលាញ់​ដើម​ឈើ ​និង​ ជួយ​អោយ​ទីក្រុង​មាន​សោភ័ណ្ឌ​ភាព​ ស្រស់​បំព្រង​ និង​ បៃ​តង​ ។
ឯក​ឧត្តម​ ឈិត​ សុខុន អភិបាល​ខេត្តព្រះសីហនុ ថ្លែងការអបអរសាទរ ដល់ក្រុម​អ្នក​ស្ម័គ្រ​ចិត្ត​ទាំង​អស់​ ដែលបាន​ចូលរួមគ្នាដាំកូនឈើ នៅតាមដងផ្លូវក្នុងទីប្រជុំជន ក្នុងក្រុងព្រះសីហនុ ហើយ​​​​​ថាយើងទាំងអស់គ្នាដាំដើមឈើ ក្រោមប្រធានបទ "យើងនាំគ្នាដាំដើមឈើ ចាំ​អង្គាល់​ទៀត”​ នេះគឺជាសារមួយមានអត្ថន័យ និង សារៈសំខាន់យ៉ាងជ្រាលជ្រៅ​បំផុត​សំរាប់​ផុស​ស្មារតី​ប្រជាពលរដ្ឋ​ មន្ត្រីរាជការ កងកម្លាំងប្រដាប់អាវុធ ពាណិជ្ជករ អាជីវករ និង សិស្សានុសិស្ស អោយ​​ចូលរួមយ៉ាងសកម្មក្នុងការដាំដុះថែរក្សាការពារព្រៃឈើសំដៅប្រែក្លាយតំបន់ទីក្រុង រឺ ​ជនបទ អោយ មានភាពស្រស់បំព្រង និង បៃតង ។ ឯកឧត្តម អភិបាលខេត្តព្រះសីហនុ បាន​មាន​ប្រសាសន៏ អោយដឹងទៀតថា កូនឈើដែលត្រូវដាំថ្ងៃនេះចំនួន ២៧០ដើម ក្នុងនោះ​មាន​ដើម​រំដួល ចំប៉ី ត្របែកព្រៃ លឿងរាជ ក្ងោក ពោធិ និង ដើមក្រញូង ត្រូវបានឯកឧត្តម អភិបាល​ខេត្ត​ ដឹកនាំ​ទៅ ដាំនៅតាមដងផ្លូវសំខាន់ៗចំនួន ៧ ក្នុងទីប្រជុំជន ក្រុងព្រះសីហនុ ឯកឧត្តម អភិបាល​ខេត្ត មាន ប្រសាសន៏បញ្ជាក់ថា រាជរដ្ឋាភិបាល កម្ពុជាមានគោលនយោបាយត្រឹមត្រូវ ក្នុង​កិច្ចការពារ​ថែរក្សា សម្បត្តិព្រៃឈើ ក្នុងនោះមានទាំងនយោបាយដាំកូនឈើ នៅគ្រប់​គឺ​កន្លែង​តាមរយៈបុណ្យរុក្ខទិវា ជារៀងរាល់ឆ្នាំ ហើយការ​កាប់បំផ្លាញ​ព្រៃឈើ​ពីជនខិលខូច​មួយ​ចំនួន​ ក៏ត្រូវបានរាជរដ្ឋាភិបាល ចាត់វិធានការបង្ក្រាបជាបន្តបន្ទាប់ ។
ជាមួយនឹងការដាំកូនឈើនៅតាមដងផ្លូវក្នុងក្រុងព្រះសីហនុ តាមភូមិដ្ឋាន និង តាមសហគមន៏ ឯកឧត្តមអភិបាលខេត្ត ក៏បានអំពាវនាវដល់វិស័យរដ្ឋ និង ឯកជន ទាំងអស់​ចូលរួម​ការពារ​ថែ​រក្សា​ព្រៃឈើ និង ដាំដើមឈើឡើងវិញ ដើម្បីធានា និរន្តភាពនៃធនធានធម្មជាតិ ហើយ​ប្រែ​ក្លាយ​​សកម្មភាពទាំងនោះទៅជាចលនាមួយចូលរួមដាំដើមឈើ តាម​គ្រប់​រូបភាព​អោយ​បាន​ច្រើន​ ៕