ក្រុមចោរលួចកាច់កម៉ូតូ៣នាក់ត្រូវបានកម្លាំងប៉ុស្តិ៍រដ្ឋបាលសង្កាត់៤និងកម្លាំងអធិការក្រុង ព្រះសីហនុចាប់ក្របួចជាប់

ជនសង្ស័យ៣នាក់ត្រូវបានកម្លាំងសមត្ថកិច្ចនគរបាលប៉ុស្តិ៍សង្កាត់៤សហការជាមួយនឹងកម្លាំងនៃអធិការដ្ឋានក្រុងព្រះសីហនុធ្វើការបង្ក្រាបនឹងឃាត់ខ្លួនបានភ្លាមៗក្រោយទទួលបានព័ត៌មានពីប្រជាពលរដ្ឋថាក្រុមចោរមួយកំពុងអង្គុយផឹកស៊ីនៅក្នុងហាងខារ៉ាអូខេមួយកន្លែងនៅតាមបណ្តោយដងវិថីឯករាជស្ថិតក្នុងក្រុមទី១៤ភូមិ៣សង្កាត់៤ក្រុង-ខេត្តព្រះសីហនុ។កាលពីវេលាម៉ោង២១យប់ថ្ងៃទី១១ខែសីហាឆ្នាំ២០១៤​លោក​វរសេនីយ៍ត្រី​ផុល ភស្តាអធិការក្រុងព្រះសីហនុបានឲ្យដឹងថាក្រុមចោរមួយក្រុមនេះកម្លាំងរបស់លោកកំពុងតាមដានស្រាវជ្រាវរកមុខសញ្ញារហូតមកដល់ពេលនេះទើបចាប់ខ្លួនបានលោកវរសេនីយ៍ត្រីបានបន្តទៀតថាជនសង្ស័យទាំង៣នេះទី១មានឈ្មោះសោម ដារា ហៅ ធី ប្រុស អាយុ ២២ មុខរបរ មិនពិតប្រាកដ ស្នាក់នៅ ក្រុមទី១ ភូមិ១ សង្កាត់១ក្រុងព្រះសីហនុទី២មានឈ្មោះ សេង ភិរម្យ ហៅ ពុង ប្រុសអាយុ១៧ឆ្នាំ មុខរបរមិនពិត ប្រាកដស្នាក់នៅក្រុម ទី១៣ ភូមិ២ សង្កាត់១ ក្រុងព្រះសីហនុ និង ជនសង្ស័យ ទី៣មានឈ្មោះ ម៉េង សុខហេង ប្រុស អាយុ ១៧ មុខរបរ ជាងសំណង់ ស្នាក់នៅក្រុមទី១៦ ភូមិ៤ សង្កាត់៤ ក្រុង-ខេត្តព្រះសីហនុ ។

និងដកហូតវត្ថុតាងបានមួយចំនួនរួមមាន៖
១-កាំភ្លើងខ្លី១ដើមម៉ាកប៉េអាកុលពណ៌សផលិតនៅសហរដ្ឋអាមេរិចមានបង់១និងមានគ្រាប់ ចំនួន៦គ្រាប់។
២-ឧបករណ៍និងសម្ភារៈសំរាប់ដោះនិងកាច់កម៉ូតូមួយចំនួន។
៣-ម៉ូតូ១គ្រឿងម៉ាក ឃ្លីក ពណ៌ក្រហមលាយ ខ្មៅ គ្មានស្លាកលេខ សារីឆ្នាំ២០១៤ ។
បច្ចុប្បន្នក្រុមជនសង្ស័យទាំង៣នាក់នេះសមត្ថកិច្ចនគរបាលនៃអធិការដ្ឋានក្រុងព្រះសីហនុ កំពុងសាកសួរនិងកសាងសំណុំរឿងបញ្ជូនទៅការិយាល័យព្រហ្មទណ្ឌខេត្តព្រះសីហនុដើម្បីចាត់ការបន្ត៕