តិរៈ​វិថី​សម្តេច ហ៊ុន សែន ត្រូវហូរដាច់ដោយសារជំនន់ទឹកភ្លៀង

ព្រះសីហនុ ៖ ដោយសារតំបន់មាត់សមុទ្រ ទទួលរងសម្ពាធទាប ធ្វើអោយខេត្តព្រះសីហនុ មានភ្លៀង ធ្លាក់​ជាច្រើនថ្ងៃជាប់ៗ បានបណ្តាលអោយផ្លូវមួយចំនួននៅក្នុងខេត្ត មានការលិចលង់ជាច្រើនកន្លែង ក្នុង​នោះតិរៈវិថីសម្តេច ហ៊ុន សែន នៅត្រង់ចំណុចចន្លោះបង្គោលគីឡូម៉ែត្រ លេខ ២៧ - ២៨ ស្ថិត​នៅ​ក្នុង​ក្រុមទី៣ ភូមិ ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ទទួលរងការខូចខាតទាំងស្រុង ដោយ​កាល​ពី​វេលាម៉ោងប្រមាណជា ២ ទៅ ៣ ជិតភ្លឺ យប់ថ្ងៃទី ៧ ឈានចូលទី ៨ ខែ កញ្ញា ឆ្នាំ ២០១៤ មាន​ភ្លៀង​ធ្លាក់គំហុកយ៉ាងខ្លាំង រហូតមកដល់ថ្ងៃ ចន្ទ ទី ៨ ខែ កញ្ញា ឆ្នាំ ២០១៤ វេលាម៉ោង ៩ និង ៥៥​នាទី​​​ តិរៈ​វិថីសម្តេច ហ៊ុន សែន ត្រង់ចំណុចខាងលើត្រូវបានអាជ្ញាធរ មានសមត្ថកិច្ច មិន​អោយ​ធ្វើ​ចរាចរ​ឆ្លងកាត់ទាំងស្រុង ពាក់ពន្ឋ និង ការដាច់ផ្លូវខាងលើ អាជ្ញាធរខេត្តព្រះសីហនុ បាន​ដាក់​បទ​បញ្ជា​ដល់​មន្ទីរ​សាធារណៈការ និង ដឹកជញ្ជូនខេត្តព្រះសីហនុ អោយត្រៀមលក្ខណៈនូវគ្រឿងចក្រ និង មធ្យោបាយ​ផ្សេងៗ ជាច្រើន រង់ចាំភ្លៀងរាំង និង ចាប់ផ្តើមធ្វើការជួសជុលផ្លូវខាងលើនេះ អោយ​បាន​លឿន​បំផុត មិនអោយមានការរាំស្ទះដល់ការធ្វើចរាចរ របស់ប្រជាពលរដ្ឋ នៅក្នុងមូលដ្ឋាន ក៏ដូ​ជា​អ្នក​ធ្វើ​​ដំណើរឆ្លងកាត់ឡើយ ។ សូម​បញ្ជាក់ថា ជំនន់ទឹកភ្លៀងនេះ ពុំ​មាន​បណ្តាល​រងគ្រោះ​ដល់​អាយុ​ជីវិត​ម​នុស្ស​ឡើយ តែបានធ្វើអោយមានផលប៉ះពាល់ដល់ការធ្វើ ដំណើរនិង ការប្រមូលផលធ្វើអាជីវកម្ម របស់​ប្រជាពលរដ្ឋ ផងដែរ លោកស្រី ម៉េង យាន មាន អាយុ ជាង៦0 ឆ្នាំ ជា​អាជីវករ​រស់​នៅ​ក្នុង​ឃុំ​អូរ​ត្រេះ​ស្រុកស្ទឹងហាវ ខេត្តព្រះសីហនុ សំណូមពរ​អាជ្ញាធរ​រដ្ឋ​អំណាច​គ្រប់​ស្ថាប័ន​ពាក់ព័ន្ធ​មេត្តា​ជួយ​ជួសជុល​ផ្លូវត្រង់ចំណុចហូរដាច់បាក់​ស្រត់​នេះ​ឲ្យ​បាន​ឆាប់​ផង​ដើម្បី​ជួយ​សម្រួល​ដល់​ការ​ធ្វើ​ដំណើរ​របស់​ប្រជាពលរដ្ឋដែលកំពុង​រស់នៅក្នុងស្រុកស្ទឹងហាវនេះទាំងមូល៕