ប្រជា​ពល​រដ្ឋ​ជាង​១០០​នាក់​មក​ពី​សហគមន៍​ ចំនួន​ ៩​ រឿង​ជម្លោះ​ដី​ធ្លី​ នាំ​គ្នា​មក​តវ៉ា​មុខ​សាលា​ខេត្ត​ព្រះសីហនុ​

ខេត្តព្រះសីហនុ ៖ ប្រជាពលរដ្ឋដែលមានជម្លោះដីធ្លី មកពីសហគមន៍ ចំនួន ៩​ដែល​មាន​គ្នា​ប្រមាណ​ជាង ១០០ នាក់ នៅទូទាំងខេត្តព្រះសីហនុ បានមកជួបជុំគ្នា ធ្វើការតវ៉ា នៅ​មុខ​សាលា​ខេត្ត​ ក្នុង​គោលបំណង ធ្វើការតវ៉ាសាជាថ្មីម្តងទៀត ។ ការ​​តវ៉ានេះ បានធ្វើឡើង នៅ​មុខ​សាលាខេត្ត​ព្រះសីហនុ​ កាល​ពីព្រឹកថ្ងៃទី ២៥ ខែសីហា ឆ្នាំ២០១៤ នេះ ។ ស្ត្រី​​​តំណាង​សហគមន៍​ដី​ធី្ល​ម្នាក់ ឈ្មោះ​ តែ រ៉ាវី បានលើកឡើងថា ពួកគាត់ មានគ្នាច្រើនរយនាក់ ដែលរងគ្រោះ ដោយ​សារ​ការ​បាត់​បង់​ដីធ្លី ក្នុងនោះមាន សហគមន៍វាលចន្ទី សហគមន៍ស្ពានឆេះ សហគមន៍អន្លង់ត្រី សហគមន៍​កោះ​ខ្យង​ សហគមន៍​ឃ្លាំងលើ សហគមន៍ព្រែកត្រែង សហគមន៍អូរដំរី សហគមន៍បិតត្រាំង និង​សហគមន៍​​​​អូរ​កម្ពុជា​។ តំណាង​សហគមន៍​ទាំង​នោះ​បានអះអាងថា ពួកគាត់បានបាត់បង់ដីស្រែ ដី​ចម្ការ​ និងដីលំនៅដ្ឋាន កន្លងមក ជាយូរឆ្នាំមកហើយ ហើយពួកគាត់ តែងបានដាក់ពាក្យបណ្តឹង រហូត​​មកដល់ពេលនេះ នៅមិនទាន់មាន ការដោះស្រាយអ្វីទាំងអស់ ទើបពេលនេះ ពួកគាត់នាំគ្នា មក​សុំឲ្យ អភិបាលខេត្តថ្មី ជួយដោះស្រាយ។
ថ្លែង​ក្នុងឪកាលនោះផងដែរ លោក នួន ប៊ុនថុល នាយកទីចាត់ការអន្តរ វិស័យនិងជា អ្នកតំណាង សាលា​ខេត្តព្រះសីហនុ​បាន​ឲ្យដឹងថាក្នុងការដោះស្រាយរឿងនេះគឺត្រូវពិនិត្យមើលទៅលើឯកសារ
ឡើង​វិញថា ប្រសិនបើឯកសារនោះពាក់ព័ន្ធនឹងរដ្ឋអំណាចមូលដ្ឋានលោកនឹងទទួលយកមកធ្វើការ
សម្របសម្រួលគិតគូរដោះស្រាយផ្ទុយទៅវិញប្រសិនបើឯកសារធ្លាប់មានជាប់ពាក់ព័ន្ធជាមួយតុលាការ គឺ​ទុក​ឲ្យ​ពួកគាត់​ឡើង​ទៅ​ដោះ​ស្រាយជាមួយ តុលាការ​ទៅ​ព្រោះ​វា​ផុត​ពី​រឿង​របស់​សាលា​ខេត្ត​ហើយ​។​ តែទោះជាយ៉ាងនេះក្តីប្រជាពលរដ្ឋទាំងនោះ បានអំពាវនាវដល់សម្តេច តេជោ ហ៊ុន សែន នាយក​រដ្ឋ​​​មន្ត្រី មេត្តាជួយដោះស្រាយផងដែរ៕