បង្ក្រាបមុខសញ្ញាគ្រឿងញៀនចាប់បានអ្នកប្រើប្រាស់គ្រឿងញៀន២នាក់ និងអ្នកចែកចាយ២នាក់

កំពង់ឆ្នាំង៖អ្នកចែកចាយនិងអ្នកប្រើប្រាស់គ្រឿងញៀន៤នាក់ត្រូវបានសមត្ថកិច្ចសហការគ្នាឡោមពទ្ធ័ចាប់ខ្លួនបានរួមទាំងវត្ថុតាងសំភារៈប្រើប្រាស់គ្រឿងញៀនមួយចំនួន  ករណីបង្ក្រាបខាងលើនេះបានធ្វើឡើងនៅកន្លែង២ផ្សេងៗពីគ្នា នៅល្ងាចថ្ងៃទី១៦ ខែសីហា ឆ្នាំ២០១៤នៅក្នុងភូមិទី៤ សង្កាត់ខ្សាម ក្រុងកំពង់ឆ្នាំង។

លោក ម៉ា យន្ត នាយ​ផ្នែក​នគរ​បាល​ព្រហ្មទណ្ឌ័​ក្រុង​កំពង់​ឆ្នាំង​ជា​អ្នក​ដឹក​នាំ​ករណី​បង្ក្រាបមុខសញ្ញាគ្រឿងញៀនខាងលើនេះបានអោយដឹងថា៖ក្រោយពីទទួបានព័ត៌សំងាត់ពីបណ្តាញរបស់ខ្លួន និងដោយមានការបញ្ជារពីលោកអធិការ លោកស្នងការខេត្ត និង​លោក​ព្រះ​រាជ​អា​ជ្ញា​​​​សាលាដំបូងខេត្ត សមត្ថ​កិច្ចនគរ​បាល​ក្រុង​កំពង់​ឆ្នាំង​បាន​សហការ​ជាមួយ​មន្ត្រី​នគរ​បាលប្រឆាំងគ្រឿងញៀនខេត្ត នគរបាលប៉ុស្តិមូលដ្ឋាន និង​ប្រជា​ការ​ពារ​ភូមិ​បង្ក្រាប​បានមុខសញ្ញា២ករណីចាប់ខ្លួនមនុស្សបាន៤នាក់និងវត្ថុតាងមួយចំនួន។

ករណីទី១ នៅម៉ោង៤និង៣០នាទីល្ងាចថ្ងៃទី១៦ ខែសីហា នៅ​ចំណុច​ផ្លូវ​បត់​ចូល​ហាង​ទន្លេសាប ក្នុងភូមិទី៤ សង្កាត់ខ្សាម សមត្ថកិច្ច​ឡោម​ពទ្ធ័​ចាប់​បាន​អ្នក​ប្រើ​ប្រាស់​​គ្រឿងញៀន២នាក់ ១ឈ្មោះ ពេជ បឿន អាយុ២៥ឆ្នាំ  ២ឈ្មោះ ឆេង សុខ​លៀង​ អាយុ​២៩ឆ្នាំពួកគេទាំង២នាក់រស់នៅភូមិអូរទទឹង ឃុំស្វាយជ្រុំ ស្រុក​រលា​ប្អៀរ​ ដកហូតបានម៉ូតូសង់កូរ៉េ ១គ្រឿង នៅ​ពេល​គេ​បាន​ទិញ​ថ្នាំញៀ​ន​ពី​អ្នក​ចែក​ចាយ​បាន២កញ្ចប់តូចៗ និងបានប្រើប្រាស់អស់ទៅហើយ។

ករណីទី២ នៅម៉ោង៥និង១៥នាទីល្ងាចថ្ងៃដដែលសមត្ថកិច្ចបានសហការគ្នាឡោម

ពទ្ធ័ផ្ទះអ្នកចែកចាយគ្រឿងញៀន១ខ្នង នៅចំណុចព្រៃឬស្សីក្នុងភូមិសង្កាត់ដដែល ចាប់បានអ្នក​ចែកចាយគ្រឿងញៀន២នាក់១ឈ្មោះ ប៊ុន ចាន់ថុល អាយុ៣២ឆ្នាំ ជា​ម្ចាស់​ផ្ទះ និង ២ឈ្មោះ ម៉ៅ សី អាយុ៣១ឆ្នាំ រស់នៅភូមិសំរោង សង្កាត់ផ្សារឆ្នាំង ក្រុង​កំពង់ឆ្នាំង។  នៅពេលចាប់ខ្លួនអ្នកចែកចាយគ្រឿងញៀនទាំង២នាក់សមត្ថកិច្ចបានរកឃើញកន្លែងដុតបំផ្លាញថ្នាំញៀន៣កន្លែងថ្មីៗនៅមុខផ្ទះជនល្មើស។ក្រោយ​ពីមានដីកាឆែកឆេរផ្ទះជនល្មើសពីលោកព្រះរាជអាជ្ញាខេត្ត សមត្ថកិច្ច​បាន​ឡើង​​​​ឆែកឆេរផ្ទះជនល្មើសរកឃើញឧបករណ៍ប្រើប្រាស់ថ្នាំញៀនមួយចំនួនមាន កញ្ចប់​​​​ដាក់ថ្នាំញៀនដែលប្រើប្រាស់រួចមួយចំនួន កាំបិតចុងស្រួច២ដើម និង​សំភារៈ​ប្រើ​ប្រាស់ថ្នាំញៀនមួយចំនួនទៀត។  នៅចំពោះមុខសមត្ថកិច្ចអ្នកប្រើប្រាស់ថ្នាំញៀន២នាក់ខាងលើបានសារភាពថា ពួក​គេធ្លាប់បានមកទិញថ្នាំញៀនពីអ្នកចែកចាយចំនួន២ដងដែលគេលក់អោយក្នុង១កញ្ចប់ៗថ្លៃ៣ម៉ឺនរៀល។ជនសង្ស័យទាំង៤នាក់រួមទាំងវត្ថុតាង ត្រូវ​បាន​សមត្ថកិច្ច​បញ្ជូន​ទៅ​កាន់​ស្នង​ការ​ដ្ឋាន​​នគរ​បាលខេត្តកសាងសំណុំរឿងតាមនិតិវិធីច្បាប់ ដើម្បី​បញ្ជូន​ខ្លួន​ទៅ​តុលា​ការ​៕ អត្ថបទដោយ៖ ឈាងវណ្ណៈ